Танцуючы на шпільках – ветэран ВАВ адзначыла 100-гадовы юбілей
© Sputnik / Инна Гришук
Падпісацца
Валянціна Баранава ў свае 100 гадоў удзельнічае ва ўсіх гарадскіх мерапрыемствах, спявае песні, танцуе і частуе гасцей фірменнымі піражкамі.
ГРОДНА, 8 ліс – Sputnik, Іна Грышук. Самая вядомая жыхарка Гродна, удзельніца Вялікай Айчыннай вайны Валянціна Баранава адзначыла 100-гадовы юбілей. У палацы Тызенгаўза ў сераду, 8 лістапада, арганізавалі сапраўднае свята з песнямі ваенных гадоў, танцамі і цёплымі словамі віншаванняў.
Сакрэт маладосці – трымаць спіну прама
Валянціна Пятроўна Баранава на свята прыехала ў доўгай чорнай сукенцы з ажурнай накідкай на плячах, святочнай прычоскай і макіяжам, у туфлях на абцасах і з прамяністай усмешкай на твары.
Пакуль у зале прыёмаў ішла апошняя падрыхтоўка і збіраліся госці, яна сказала: "Хачу танцаваць!". І ўзяўшы прыяцельку пад рукі пачала лёгка кружыцца па зале, нібы забыўшыся аб гадах. А потым падзялілася сакрэтам свайго даўгалецця і энергіі.
© Sputnik / Инна Гришук
"Калі мне было тры гады, маці заўсёды нагадвала, што трэба трымаць спіну роўна, я ж балерынай марыла быць. Маміны словы памятаю да гэтага часу. Як толькі выходжу з дому, выпростваю плечы. Дома ж над плітой стаіш, гатуеш, прыбіраеш. Але як толькі выйшаў з дому – даеш сабе сігнал, трымаць спіну роўна", - распавяла Валянціна Пятроўна.
Успамінае, што яе звычку заўсёды заўважаюць знаёмыя, часам жартуюць. Але аднойчы забылася даць сабе такую каманду, ішла з цяжкімі сумкамі і сустрэла маладога выкладчыка з педагагічнага каледжа, у якім шмат гадоў працавала.
"Яна мяне тады спытала, чаму я іду, сагнуўшыся, як старая. Мяне тады гэтае слова закранула вельмі. Калі трымаеш спіну прама – выглядаеш і адчуваеш сябе маладым", - адзначыла ветэран.
Пажаданні ад прэзідэнта
У святочнай зале сабраліся дзесяткі гасцей – кіраўнікі з міністэрстваў, абласной і гарадской улады, дэпутацкага корпуса, сілавых ведамстваў, буйных прадпрыемстваў горада, сябры, родныя і калегі ветэрана.
"Жывіце як можна даўжэй, працягвайце выхоўваць нашу моладзь. Без вас будзе вельмі цяжка. Такія людзі, як вы, зараз на вагу золата. Вы – захавальнікі праўды, процівага тым, хто адмаўляе генацыд беларускага народа", - зачытаў віншавальную прамову памочнік прэзідэнта па Гродзенскай вобласці Юрый Караеў.
© Sputnik / Инна Гришук
Старшыня Гродзенскага аблвыканкама Уладзімір Каранік захапляўся той настойлівасцю, з якой Валянціна Пятроўна імкнулася на фронт і тым, як моцна яна любіла Радзіму.
Валянціна Баранава нарадзілася ў Сібіры, школу скончыла ў горадзе Абакан. Вайна пачалася, калі ёй было ўсяго 17 гадоў, раніцай пасля выпускнога вечара. Будавала планы на будучыню – збіралася працаваць у бальніцы, як маці. Але мары прыйшлося адкласці. Учарашняя школьніца напісала чатыры заявы, хацела пайсці добраахвотнікам, перш чым атрымаць павестку.
Спачатку юную Валянціну адправілі ў Краснаярск – тут у палку сувязі на працягу паўтара месяца праходзіла падрыхтоўку, асвойвала тэхніку перадачы азбукі Морзе. А каб трапіць на фронт, разам з будучымі аднапалчанамі за дзве ночы прайшлі больш за 70 кіламетраў. Днём гэта рабіць было небяспечна, бо мясцовасць прастрэльвалася немцамі.
"Ведаю некаторыя эпізоды вашай ваеннай біяграфіі, напрыклад, той, за які вы атрымалі ордэн Чырвонай Зоркі, калі вы пакінулі маладога байца ў бліндажы, а самі пайшлі ліквідаваць разрыў ліній сувязі", - адзначыў Уладзімір Каранік.
© Sputnik / Инна Гришук
Усё жыццё з песняй
Валянціна Баранава прайшла вайну радавой сувязісткай, даслужылася да сяржанта, удзельнічала ў вызваленні Данбаса і Адэсы, Польшчы, Чэхаславакіі і Усходняй Германіі. Пры гэтым заўсёды старалася ўдзельнічаць ва ўсіх франтавых канцэртах, спявала песні і старалася падтрымліваць баявы дух аднапалчан.
Пасля вайны Валянціна Пятроўна атрымала спецыяльнасць вучонага заатэхніка, але жыццё звязала яе з музычнай сферай. У 1955 годзе яна з мужам пераехала ў Гродна. Мужа запрасілі працаваць выкладчыкам у Гродна ў сельскагаспадарчы інстытут, а Валянціне Пятроўне прыйшлося змяніць прафесію, бо мужу і жонцы ў той час забаранялася працаваць у адной арганізацыі.
Яна скончыла музычную школу, затым музычнае вучылішча па спецыяльнасці "выкладчык музыкі". Шмат гадоў працавала па спецыяльнасці. Пасля выхаду на пенсію і да сённяшняга дня вядзе актыўную грамадскую працу, удзельнічае ў гарадскіх і рэспубліканскіх мерапрыемствах, выступае перад школьнікамі і студэнтамі і ўдзельнічае ў патрыятычным выхаванні моладзі.
© Sputnik / Инна Гришук
На юбілейным вечары, калі выконвалі песню ваенных гадоў, Валянціна Пятроўна ўспомніла адзін з такіх франтавых канцэртаў і экспромтам праспявала адну з любімых песень сваіх баявых таварышаў – "Махорочка".
Многія з прысутных пасля віншаванняў шчыра абдымалі Валянціну Пятроўну, рабілі фота з ёй на памяць і часта ўспаміналі яе найсмачныя фірменныя піражкі і рагалікі, якімі яна частуе сваіх гасцей.
Імя Валянціны Баранавай занесена ў Кнігу Славы Гродзенскай вобласці, ёй прысвоена ганаровае званне "Чалавек года Гродзеншчыны-2018". Указам прэзідэнта №128 ад 2 мая 2023 года Валянціна Баранава ўдастоена ордэна Пашаны. Высокую ўзнагароду яна атрымала асабіста з рук кіраўніка дзяржавы.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Таксама на Sputnik:
Пранізлівая гісторыя пра вайну і канцлагеры і кранальны вальс Перамогі – відэа
Сляды нямецкай акупацыі: бункеры і ДАКі ў Мінску
Усю вайну за штурвалам Пе-2: легендарную лётчыцу сустракалі ў Брэсце – відэа
