МІНСК, 4 лют — Sputnik. Мексіканскі рэжысёр Гільерма дэль Тора заваяваў галоўную ўзнагароду Гільдыі рэжысёраў ЗША за фільм "Форма вады", паведамляецца на сайце прэміі.
Прэмію ўручылі з фармулёўкай "за выдатныя дасягненні ў галіне рэжысуры мастацкага фільма". Рэжысёр быў вылучаны на гэтую ўзнагароду ўпершыню за сваю кар'еру. Саму прэмію ўручылі ў сямідзесяты раз.
Кінафільм "Форма вады" распавядае аб глуханямой прыбіральшчыцы, якая працуе ў сакрэтнай лабараторыі. Жанчына ўлюбляецца ў істоту-амфібію, якая жыве там, і спрабуе яе выратаваць. Карціну раней назвала лепшай Гільдыя прадзюсараў ЗША.
На галоўную прэмію Гільдыі рэжысёраў ЗША таксама прэтэндавалі рэжысёры Грэта Гервіг за фільм "Лэдзі Бёрд", Марцін Макдонах за карціну "Тры білборда на мяжы Эбінга, Місуры", Крыстафер Нолан за "Дзюнкерк" і Джордан Піл за фільм "Прэч".
Цырымонія ўручэння прэмій Гільдыі рэжысёраў ЗША адбылася ў ноч на 4 лютага ў Лос-Анджэлесе.
