МІНСК, 21 кра — Sputnik. Букмекерскія канторы паніжаюць шанцы прадстаўніка Беларусі на конкурсе песні "Еўрабачанне 2018" на пападанне ў фінал шоу.
"Еўрабачанне 2018" адбудзецца ў Лісабоне (Партугалія) 8-12 мая. Сваіх прадстаўнікоў на маштабны конкурс адпраўляюць 43 краіны, у тым ліку і Беларусь.
Прадстаўнік Беларусі ўкраінскі поп-спявак Alekseev выступіць у рамках першага паўфіналу "Еўрабачання" 8 мая. Паводле ставак букмекераў на вынікі кваліфікацыі, артыст зможа заняць толькі 13-е месца з 19 — такім чынам, у выхад Аляксеева ў фінал яны не вельмі вераць. Нагадаем, па выніках паўфіналаў у фінал праходзяць па дзесяць артыстаў.
Ускладняе сітуацыю тое, што Беларусь будзе выступаць у "моцным" паўфінале разам з відавочнымі фаварытамі конкурсу — прадстаўнікамі Ізраіля, Чэхіі, Балгарыі і Эстоніі.
У "агульным заліку" ў букмекераў Alekseev пакуль займае 16-е месца з 43. Прыблізна такія ж пазіцыі яму абяцаюць ужо некалькі тыдняў запар.
Пераможцам жа "Еўрабачання" букмекеры па-ранейшаму называюць ізраільцянку Netta, якая выканае песню "Toy". Высокія шанцы на перамогу ў прадстаўнікоў Чэхіі і Балгарыі, а таксама Аўстраліі.
Букмекерскія канторы нярэдка памыляюцца са сваімі прагнозамі наконт вынікаў "Еўрабачання". Так, у мінулым годзе яны не вельмі высока ацэньвалі шанцы беларусаў Naviband на выхад у фінал, хоць група змагла прабіцца ў апошні этап шоу. Не адгадалі яны ў 2017-ым і пераможцу — тады першае месца прарочылі італьянцу Франчэска Габані, які ў выніку заняў толькі шостае месца.
