МІНСК, 25 кра — Sputnik. Беларуская дэлегацыя адправіцца ў Лісабон для ўдзелу ў міжнародным песенным конкурсе "Еўрабачанне 2018" ужо 28 красавіка, паведамілі Sputnik у прэс-службе Белтэлерадыёкампаніі.
Беларусь на "Еўрабачанні" ў гэтым годзе прадставіць украінскі поп-спявак Alekseev з песняй Forever. Першы раз на сцэну артыст падымецца 8 мая ў рамках першага паўфіналу, аднак для падрыхтоўкі выступу ўдзельнікі выязджаюць значна раней.
Так, ужо 28 красавіка афіцыйная беларуская дэлегацыя ў складзе прадстаўнікоў Белтэлерадыёкампаніі, Мікіты Аляксеева і яго творчай каманды адправіцца ў Лісабон.
Першая рэпетыцыя беларускага выканаўцы пройдзе 29 красавіка, наступная індывідуальная рэпетыцыя прызначана на 3 мая. У першым паўфінале Alekseev выступіць пад нумарам восем.
У гэтым годзе Беларусь будзе ўдзельнічаць у "Еўрабачанні" ўжо ў 15-ы раз. Замежны артыст прадставіць нашу рэспубліку ўпершыню.
Пакуль букмекерскія канторы не вельмі высока ацэньваюць шанцы Alekseev на перамогу ў шоу — цяпер ён сярод 43 артыстаў знаходзіцца на 17 месцы. Зрэшты, каманда спявака абяцае зладзіць грандыёзнае шоу.
