МІНСК, 3 чэр - Sputnik. Знойдзены ў рацэ Бярэзіне шлем перыяду ранняга Сярэднявечча мог належаць князю Ізяславу, паведамілі ў нядзелю ў эфіры тэлеканала СТБ.
Сенсацыйная археалагічная знаходка была зроблена ў пачатку красавіка ў Бабруйску: пры чыстцы рэчышча ракі ў пяшчаным адвале знайшлі металічны шлем, датаваны, як мяркуецца, X-XI стагоддзямі.
Як распавёў у эфіры гісторык Мікалай Сілкоў, усяго ў свеце было знойдзена 19 шлемаў таго часу, бабруйскі стаў дваццатым. Паводле яго слоў, хутчэй за ўсё, ён быў выраблены скандынаўскімі майстрамі, а затым прывезены на тэрыторыю цяперашняй Беларусі.
"Менавіта такія шлемы называлі залатымі. Такія шлемы належалі, як правіла, менавіта тым, хто кіраваў дружынай, як правіла, першым у бой ішоў князь. Усё гэта дазваляе казаць, што гэта ўнікальная рэч, якая, безумоўна, належала чалавеку з высокім сацыяльным статусам", - сказаў дэпутат Палаты прадстаўнікоў, навуковец Ігар Марзалюк.
Ён таксама зноў нагадаў, што нельга выключаць таго, што шлем мог належаць князю Ізяславу, сыну Рагнеды.
"Гэтую тэрыторыю (у Бабруйску - Sputnik) трэба грунтоўна даследаваць. Я думаю, што нас чакаюць вялікія адкрыцці", - падсумаваў ён.
У эфіры тэлеканала таксама распавялі, што ў цяперашні час шлем знаходзіцца на рэстаўрацыі: зараз яго чысцяць ад вокіслаў, каб даследаваць паверхню, дакладна вызначыць час вырабу і зберагчы метал ад разбурэння.
Князь Ізяслаў з'яўляецца сынам полацкай князёўны Рагнеды і князя кіеўскага Уладзіміра Святаславіча, родапачынальнікам дынастыі полацкіх князёў. Нарадзіўся ён, як мяркуецца, у 978 годзе, а памёр у 1001 годзе. Месца пахавання князя не вядома.
