ГРОДНА, 5 сак — Sputnik, Валерыя Салаўёва. Плошча Савецкая ў Гродна на адзін дзень ператварылася ў сапраўдны горад майстроў. У суботу тут адкрыўся традыцыйны фестываль у гонар святога Казіміра "Казюкі".
У гэтым годзе кірмаш аказаўся адным з самых масавых. Ён сабраў больш за 150 розных майстроў і рамеснікаў з розных гарадоў нашай краіны, Літвы, Польшчы, Украіны і Расіі.
Гандаль у гэты дзень ішоў даволі бойка. На гандлёвых шэрагах былі прадстаўлены разнастайныя вырабы з гліны, металу, дрэва, скуры, бісеру, выкананыя рамеснікамі.
Традыцыйна прыехалі кавалі, якія на працягу дня на вачах у мінакоў праводзілі майстар-класы, прадавалася кухоннае начынне з дрэва і гліны, упрыгожванні, розныя прадметы дэкору. Напрыклад, выкананыя з гліны гадзіннік з Пагоняй або мапай Беларусі.
Часам сустракаліся і незвычайныя вырабы. Напрыклад, майстры з Зэльвы прывезлі драўляныя іконы, выразаныя з суцэльных кавалкаў дрэва. Яшчэ адзін рамеснік прадаваў мару кожнага хулігана — драўляныя рагаткі. А на здзіўленыя воклічы некаторых мінакоў казаў, што сучасныя дзеці хутка нават не будуць ведаць, што гэта такое.
Многія жанчыны неслі дадому высокія плеценыя далікатныя кветкі, зробленыя са звычайнай саломы, і кошыкі з лазы. Самыя модныя прымяралі ажурныя шапачкі, звязаныя прыезджымі майстрыхамі, квяцістыя абручы, металічныя ўпрыгожванні ручной працы.
На кірмашы практычна ўвесь дзень было шматлюдна, шумна і весела. Рамеснікі вераць — як першы дзень гандлю на "Казюкі" пройдзе, такі ж ён будзе і на працягу года.
Кірмаш "Казюкі" праходзіць у Гродна ўжо больш за 25 гадоў менавіта ў Дзень святога Казіміра, які адзначаецца 4 сакавіка. Гэты святы лічыцца заступнікам Гарадзенскай каталіцкай дыяцэзіі, моладзі, майстроў і рамеснікаў.
