МАГІЛЁЎ, 1 чэр — Sputnik, Марыя Зуева. Касцёл Успення Найсвяцейшай Панны Марыі і Святога Станіслава ў Магілёве зачынілі, але ненадоўга. Як стала вядома карэспандэнту Sputnik, у храме вядзецца ўстаноўка сапраўднага механічнага аргана.
У мэтах бяспекі прыхаджан на час узняцця канструкцый музычнага інструмента на хоры было прынята рашэнне спыніць працу касцёла ў звычайным рэжыме з 8:00 да 19:30. Па звыклым раскладзе праводзіліся толькі набажэнствы. Але рашотцы на дзвярах каталіцкія вернікі былі толькі рады — для іх гэта доўгачаканая падзея.
"Калі загучыць новы арган у касцёле — гэта стане сапраўднай гістарычнай падзеяй для нас. Мы чакалі і, нарэшце, дачакаліся", — распавёў вернік Яўген.
Старадаўні арган даставілі ў Магілёў яшчэ ў лютым гэтага года. Да гэтага часу, як таго патрабуе тэхналогія, ён "спаў" у сценах касцёла і прызвычайваўся да мясцовых кліматычных умоў. І вось, нарэшце, пачаліся мантажныя працы.
Да нядаўняга часу ў каталіцкім храме Успення Найсвяцейшай Панны Марыі і Святога Станіслава выкарыстоўваўся электронны арган. Яго даўно марылі замяніць на сапраўдны. Як вядома, да ўсталявання ў горадзе савецкай улады ў касцёле гучаў механічны арган з рэдкімі керамічнымі трубкамі. Ён быў неверагодна каштоўны. Па звестках мясцовых гісторыкаў, на той момант такіх інструментаў у свеце было толькі чатыры: у Рыме, Варшаве, Мехіка і Магілёве. У 1956 годзе касцёл быў зачынены, пасля чаго арган разабралі. Пасля ён бясследна знік.
На гэты раз механічны арган прывезлі ў Магілёў з Нідэрландаў. Ён быў выраблены ў 1928 годзе і з'яўляецца 47-м творам вядомага майстра Леона Верс Хуэрэн дэ Хэйт Хусэна. Інструмент выкананы ў гатычным стылі.
Працы па мантажы працягнуцца не менш як паўтара месяца. Тэрміны арыенціровачныя. Усё залежыць ад таго, наколькі ўдала пойдзе зборка старадаўняга інструмента. Акрамя таго, гэта будзе не проста мантаж, а рэстаўрацыя канструкцый аргана. Яе праводзіць запрошаны спецыяліст з Польшчы.
Урачыстае адкрыццё запланавана на 15 жніўня — гэта дзень прыходу Успення Прасвятой Багародзіцы. Менавіта ў гэты дзень плануецца правесці і інаўгурацыю — выкананне на аргане першага твора.
Касцёл пасля двух тыдняў яго закрыцця сёння працуе зноў у ранейшым рэжыме. Час, калі жыхары і госці Магілёва змогуць цалкам адчуць усю прыгажосць арганнай музыкі, ужо блізка.
