МІНСК, 11 вер — Sputnik. Выбары ў ніжнюю палату беларускага парламента завяршыліся ў нядзелю ў краіне: а 20:00 закрыліся ўчасткі для галасавання.
Паводле звестак Цэнтрвыбаркама Беларусі, адбыўшыміся выбары былі прызнаныя па стане на 15:00 нядзелі, калі яўка выбаршчыкаў склала 52,49%.
У асноўны электаральны дзень галасаванне праходзіла ў 110 акругах, на 110 месцаў у парламенце прэтэндавала 485 кандыдатаў, прычым упершыню для перамогі ў акрузе ім было дастаткова адноснай колькасці галасоў.
Датэрміновае галасаванне на выбарах ажыццяўлялася з аўторка, па дадзеных ЦВК, датэрмінова ўзялі ўдзел у выбарах 31% выбаршчыкаў.
Характэрна, што 63,5% кандыдатаў — прадстаўнікі палітычных партый. Пры гэтым больш за 70% кандыдатаў балатуюцца ў парламент упершыню, астатнія кандыдаты ўжо былі дэпутатамі парламента папярэдніх скліканняў.
Па дадзеных ЦВК, у спісы выбаршчыкаў уключаны каля 6,99 мільёна чалавек, у тым ліку 4,4 тысячы чалавек за мяжой. Для назірання за выбарамі ў Беларусі былі акрэдытаваныя 825 замежных і міжнародных назіральнікаў, у тым ліку ад СНД, БДІПЧ АБСЕ, Парламенцкай асамблеі АБСЕ, ПАСЕ, ШАС і іншых арганізацый, а таксама прадстаўнікі дыпламатычнага корпуса і незалежныя назіральнікі.
Парушэнняў не было
Ноч, якая папярэднічала асноўнаму дню выбараў, прайшла спакойна. Як адзначыла кіраўнік ЦВК Лідзія Ярмошына, "за мінулую ноч ніякіх надзвычайных сітуацый на выбарчых участках не было". Паводле яе слоў, усе выбарчыя ўчасткі знаходзяцца ў цэласнасці і захаванасці.
З нагоды скаргаў Ярмошына паведаміла, што яны калі і паступалі, то ў асноўным гэта былі скаргі назіральнікаў на тое, што іх не акрэдытавалі. Пры гэтым яна звярнулася да старшыні Брэсцкай абласной выбарчай камісіі падчас прамога ўключэння і заявіла, што ў яе ёсць інфармацыя "аб нейкіх новых тэхналогіях падліку выбаршчыкаў, які назіральнік прымяняе на выбарчым участку ў Баранавічах". Па словах Ярмошынай, гэта падстава для пазбаўлення акрэдытацыі назіральніка.
Аб адсутнасці парушэнняў на працягу дня заяўлялі і назіральнікі ад МПА СНД, а таксама ад ШАС. Прадстаўнікі БДІПЧ АБСЕ і ПАСЕ ў ацэнках выбарчага працэсу былі больш асцярожнымі і заявілі, што сваё бачанне ходу галасавання яны змогуць прадставіць толькі ў панядзелак.
Міжнародныя назіральнікі адзначалі, што на выбарах пануе "сямейная ўтульная атмасфера" і падкрэслівалі, што ім прыемна бачыць узнёслы настрой грамадзян краіны.
Галасаванне на "ўчастку №1" і стасункі з журналістамі
Прэзідэнт Беларусі Аляксандр Лукашэнка, як і абяцаў, прыйшоў на выбарчы ўчастак разам з малодшым сынам Мікалаем, але, у адрозненне ад мінулых выбараў, на гэты раз укінуў запоўнены бюлетэнь у скрыню сам, а не даверыў гэтую місію Мікалаю.
Пасля галасавання прэзідэнт больш за гадзіну размаўляў з журналістамі, адказваючы на пытанні прадстаўнікоў беларускіх і расійскіх як дзяржаўных, так і недзяржаўных СМІ. Кіраўнік дзяржавы расказаў пра дамоўленасці па газавай спрэчцы з Расіяй, пра сваё бачанне дэпутацкай працы, пра санкцыі Захаду і пра тарыфы на ЖКП, а таксама пра тое, якім ён бачыць Мінск.
Адной з цэнтральных тэм прэс-канферэнцыі стаў інцыдэнт з вынасам беларускай дэлегацыяй на Паралімпійскіх гульнях расійскага сцяга. Лукашэнка падкрэсліў, што гэта пазіцыя не толькі беларускай дэлегацыі, але і дзяржавы ў цэлым, і дадаў, што расцэньвае гэтую акцыю як пратэст супраць несправядлівасці. Прэзідэнт заўважыў, што МАК і WADA "трэба добра страсянуць" і запатрабаваў прадставіць доказы таго, што расійскія спартоўцы ўжывалі допінг.
Прэс-канферэнцыя была адной з самых адкрытых: магчымасць задаць пытанні атрымалі ўсе журналісты, якія хацелі гэта зрабіць.
Каўбасныя бабы, танцы і народныя забавы
Дні выбараў у Беларусі традыцыйна ўспрымаюцца як святочныя, і гэтыя парламенцкія выбары не сталі выключэннем.
У асноўны дзень галасавання на ўсіх участках працавалі буфеты, у якіх выбыршчакам прапаноўваліся стравы беларускай кухні, чай і кава, а дзе-нідзе — і моцныя напоі.
Пальму першынства, безумоўна, атрымаў "участак нумар адзін", які скарыў журналістаў прадуктовым дызайнам. Тут можна было ўбачыць зробленую з каўбас і вэнджаніны бабу ў вышываным фартуху і хустцы, торт у форме карты Беларусі, запечаных малочных парасят і фаршаваных асятроў, ажурныя караваі, мноства іншых закусак, ласункаў і вэнджаніны.
