МІНСК, 29 сту — Sputnik. Такім магутным зарадам інтэлекту стартаваў у Магілёве Год навукі. Мерапрыемства праходзіла ў рамках VIII рэспубліканскага конкурсу "ТэхнаІнтэлект".
Навучэнцы ўстаноў агульнай сярэдняй і дадатковай адукацыі горада ва ўзросце ад 11 да 19 гадоў прэзентавалі свае работы па 11 секцыях. І хто ведае, мабыць, менавіта сённяшнія прапановы вучняў па робататэхніцы, макетаванні ці рацыянальным выкарыстанні навакольнага асяроддзя ужо з'яўляюцца сур'ёзнымі навуковымі распрацоўкамі.
Ва ўсялякім разе на вельмі многія праекты юных вынаходнікаў — пераможцаў папярэдніх конкурсаў ужо звярнулі ўвагу вядучыя канструктары машынабудаўнічых прадпрыемстваў краіны.
А для юных вынаходнікаў гэта добры стымул заняцца навукай прафесійна — імёны пераможцаў прапануюцца для занясення ў банк адораной моладзі краіны.
Летась другое месца на рэспубліканскім конкурсе заняла работа магіляўчаніна Аляксандра Палюшына, які прапанаваў энерга-зберагальны паяльнік.
Вынікі рэспубліканскага конкурсу "ТэхнаІнтэлект" будуць падведзены ў сакавіку.
