МІНСК, 8 сне — Sputnik. Парывісты вецер захаваецца ў Беларусі ў пятніцу 9 снежня, папярэдзілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя.
Надвор'е ў рэспубліцы рэзка змянілася ў ноч з серады на чацвер: пасля маразоў тэмпература павысілася, а раніцай 8 снежня ў шэрагу раёнаў прайшоў ледзяны дождж, які істотна ўскладніў дарожную абстаноўку.
"Ноччу і раніцай 9 снежня ў многіх раёнах краіны і ў Мінску захаваецца заходні вецер парывамі да 15-18 м/с", — сказалі ў Гідрамеце.
Там таксама паведамілі, што ў сувязі з неспрыяльнымі ўмовамі надвор'я ў краіне аб'яўлены перадапошні — аранжавы — узровень небяспекі.
Аранжавы ўзровень небяспекі абвяшчаецца, калі ўмовы надвор'я могуць прадстаўляць рэальную небяспеку. Гаворка ідзе пра шквал, ліўні, навальніцы, град, спякоту або маразы і іншае. Пры гэтым мяркуецца, што чаканыя з'явы могуць негатыўна паўплываць на сацыяльна-эканамічную дзейнасць і прывесці да значнай матэрыяльнай шкоды.
