Стракаты пітон

Мінпрыроды праверыць умовы ўтрымання дзікіх жывёл у няволі

13
(абноўлена 11:41 30.08.2018)
У верасні супрацоўнікі будуць прыходзіць з праверкамі да ўладальнікаў дзікіх жывёл і просяць беларусаў паведамляць пра факты незаконнага ўтрымання такіх жывёл у няволі.

МІНСК, 30 жні — Sputnik. Месцы ўтрымання дзікіх жывёл у няволі ў верасні правераць супрацоўнікі Міністэрства прыродных рэсурсаў і аховы навакольнага асяроддзя, паведамілі ў ведамстве.

У Беларусі для ўтрымання дзікай жывёліны ў няволі яе неабходна зарэгістраваць. У 2016 годзе беларусы зарэгістравалі 36 відаў, у 2017 — 46 відаў дзікіх жывёл. Найбольш папулярнымі сталі павукі-птушкаяды, трохкаляровыя дрэвалазы, звычайныя ўдавы, каралеўскія і тыгровыя пітоны. Таксама фізічныя і юрыдычныя асобы рэгістравалі на тэрыторыі Беларусі кайманавага кракадзіла, вінтарогага казла, ігуану, макаку і амурскага тыгра.

Пад праверку падпадуць месцы ўтрымання і гадоўлі ў няволі занесеных у Чырвоную кнігу дзікіх жывёл, а таксама жывёл, якія падпадаюць пад Канвенцыю аб міжнародным гандлі відамі дзікай фауны і флоры і якія знаходзяцца пад пагрозай знішчэння. Правераць і ўтрыманне дзікіх жывёл, адлоўленых на падставе дазволу на выключэнне з асяроддзя пражывання.

Пры праверцы патрабаванні прад'яўляюцца як да плошчы і глыбіні памяшканняў, так і да забеспячэння патрэбаў канкрэтнага віду. Асобнае патрабаванне — жывёла не павінна мець магчымасць самастойна выбрацца з памяшкання, у якім утрымліваецца.

Мінпрыроды просіць тых, хто ведае аб незаконным утрыманні ў няволі дзікіх жывёл, паведаміць у абласныя або ў мінскі гарадскі камітэт прыродных рэсурсаў і аховы навакольнага асяроддзя.

13
Тэги:
Жывёльны свет, Міністэрства прыродных рэсурсаў і аховы навакольнага асяроддзя РБ, Беларусь
Каментары