Буслы ў полі

Амаль усе буслы ўжо паляцелі з Беларусі

24
(абноўлена 11:46 31.08.2018)
Буслы традыцыйна пакідаюць рэспубліку ў канцы жніўня, аднак некаторыя асобіны вырашаюць заставацца тут на зіму.

МІНСК, 31 жні — Sputnik. Большасць буслоў ужо пакінулі Беларусь, паведаміў Sputnik у пятніцу спецыяліст па прыродаахоўных пытаннях грамадскай арганізацыі "Ахова птушак Бацькаўшчыны" Сямён Левы.

У канцы жніўня карыстальнікі сацыяльных сетак сталі паведамляць пра масавы адлёт буслоў з рэспублікі — многія звязвалі гэта з няўстойлівым надвор'ем, якое ўстанавілася ў Беларусі ў канцы лета. Зрэшты, арнітолагі запэўніваюць: гэта нармальная з'ява.

"Белыя буслы традыцыйна пакідаюць Беларусь да трэцяй дэкады жніўня. Большасць птушак ужо пакінулі нашу краіну", — распавёў Sputnik спецыяліст.

Зімаваць белыя буслы будуць у Афрыцы. "Тэрміны міграцыі могуць быць расцягнуты на некалькі тыдняў", — удакладніў Левы.

"Некаторых буслоў можна будзе сустрэць у Беларусі і ўвосень, і нават узімку — бывае так, што асобіны вырашаюць застацца тут на зімоўку, прычым не толькі аслабленыя, але і здаровыя. Напрыклад, ужо пяць гадоў у мінскіх Шабанах зімуе бусел. Першыя гады мясцовыя жыхары тэлефанавалі нам і прасілі дапамагчы яму, але потым прывыклі — ён сам вырашае там зімаваць, чаму — невядома", — дадаў арнітолаг.

Беларусь ужо масава пакідаюць многія пералётныя віды, у тым ліку чорныя стрыжы, залацістыя шчуркі і івалгі. "Зязюлі ў большасці сваёй ляцець пачалі яшчэ ў ліпені", — дадаў суразмоўца агенцтва.

А вось гракі — знакамітыя персанажы карціны Аляксея Саўрасава "Гракі прыляцелі" — у большасці сваёй Беларусь не пакідаюць, сустрэць іх тут можна і зімой. Як адзначыў арнітолаг, пісаў сваю працу мастак у больш паўночных рэгіёнах, з якіх гэтыя птушкі сапраўды мігруюць. Аднак для Беларусі ў прысутнасці зімой гракоў няма нічога дзіўнага.

24
Тэги:
Бусел, Беларусь
Каментары