МІНСК, 19 ліс - Sputnik. Першы снег у Брэсце парадаваў гараджан і ўскладніў рух транспарту, а з-за густога туману па ўсёй краіне сіноптыкі абвясцілі аранжавы ўзровень небяспекі. Больш падрабязна - у аглядзе Sputnik.
У Беларусі аранжавы ўзровень небяспекі
Пра неспрыяльныя ўмовы надвор'я беларусаў папярэдзілі ў Белгідраметцэнтры. Па дадзеных спецыялістаў, у бліжэйшыя дні ў рэспубліцы ўсталюецца густы туман, які можа ўскладніць рух на дарогах.
Паведамляецца, што туман чакаецца з вечара нядзелі, ён захаваецца і ў панядзелак: бачнасць, па словах спецыялістаў, будзе складаць 100-500 метраў. У МНС нагадалі: у такіх умовах асабліва асцярожнымі неабходна быць аўтамабілістам.
У панядзелак будзе снег і галалёдзіца
Надвор'е ў Беларусі ў панядзелак стане вызначаць халодны антыцыклон: на яго паўплываюць франтальныя сістэмы з поўначы еўрапейскай часткі Расіі. У гэты дзень будзе холадна і вільготна.
Па дадзеных сіноптыкаў, 19 лістапада амаль па ўсёй краіне пройдзе мокры снег, а на асобных участках дарог чакаецца галалёдзіца. Уначы -5..+2°С, а днём тэмпературны паказчык будзе вар'іравацца па рэспубліцы ад -3°С да +3°С.
У Брэсце выпаў першы снег
Усю нядзелю жыхары абласнога цэнтра віншавалі адзін аднаго з першым у гэтым годзе снегам і дзяліліся здымкамі заснежанага горада ў сацыяльных сетках. Шмат хто ўжо зляпіў першага снегавіка і задзейнічаў санкі. Іншыя ж любаваліся снегам з акна цёплай кватэры.
Аднак ёсць і іншы бок: гараджане паскардзіліся адзін аднаму на слізкія тратуары і негатоўнасць камунальнікаў да снегу. Паведамлялася таксама, што ў Брэсце ўтварыліся заторы на цэнтральных вуліцах, былі перашкоды руху аўтамабіляў і грамадскага транспарту, здарылася некалькі ДТЗ.
