"Сплин", Гедымін, танцы на сталах. Як Ліда гуляла на Lidbeer-2019

Беларуская копія Актобэрфэста - фестываль хмеля, соладу і вады Lidbeer-2019 у пяты раз прайшоў у Лідзе 7 верасня. Як гуляла і гула ў гэты дзень Ліда, распавядае ў фотастужцы карэспандэнт Sputnik Іна Грышук.

Для тых, хто яшчэ не ведае ці не бываў на Lidbeer - гэта такі беларускі Актобэрфэст, які ўжо пяць гадоў праходзіць у Лідзе і збірае дзясяткі тысяч гасцей. Традыцыйна свята сумяшчаюць з днём нараджэння горада, таму горад гуляе з раніцы і да позняга вечара.

Усе цэнтральныя вуліцы Ліды на дзень ператварыліся ў вялікі рэстаран пад адкрытым небам. Хтосьці адпачываў у крытых палатках за столікамі, хтосьці - на палетах, размешчаных на гарадскіх газонах, хтосьці - проста на траве ля сцен Лідскага замка.

Забавы тут маглі знайсці і дарослыя, і дзеці, і людзі старэйшага ўзросту. Тут было прадстаўлена мноства забаўляльных зон, выступалі музыкі, гасцей забаўлялі жывыя скульптуры, працавалі гандлёвыя рады са шматлікімі сувенірамі. У святочны дзень прайшло адкрыццё помніка вялікаму князю Гедыміну, а ў Лідскім замку гасцям свята паказалі вежу Гедыміна, якая да гэтага ні разу не прымала наведвальнікаў. Тут можна было ўбачыць выставу з партрэтамі вялікіх князёў ВКЛ і пабываць у пакоях заснавальніка Лідскага замка Гедыміна.

Увечары народ пацягнуўся да галоўнай сцэны фестывалю, дзе да позняй ночы праходзіў магутны канцэрт. Хэдлайнерамі ў гэтым годзе сталі Элджэй, культавыя рок-гурты "Сплин" і "Чайф". Пасля заканчэння канцэрта і салюту свята ў горадзе не скончылася. Самыя разгарачаныя госці фестывалю напрыканцы зладзілі гарачыя танцы на сталах пад песні Макса Каржа і гурта "Ленинград".