МІНСК, 29 вер — Sputnik. Дзяржсакратар МЗС Латвіі Андрэйс Пілдэговічс запрасіў Беларусь наведаць бізнес-форум 16+1, які пройдзе ў лістападзе ў Рызе, паведаміў Sputnik Латвія.
У рамках візіту ў Беларусь на гэтым тыдні Пілдэговічс сустрэўся з першым намеснікам міністра замежных спраў Беларусі Андрэем Еўдачэнка.
Візавы рэжым і рэадмісія
Латвійскі дыпламат падкрэсліў, што Латвія зацікаўлена ў працягу і развіцці праектаў у сферы транспарту, транзіту і лагістыкі, а таксама запрасіў беларускіх прадпрымальнікаў наведаць бізнес-форум 16+1, які пройдзе ў Рызе ў лістападзе.
Пілдэговічс звярнуў увагу на ўстаноўленыя беларускім бокам гандлёвыя абмежаванні на экспарт рыбы і цэменту, а таксама затрымку з выдачай сертыфікатаў для прадукцыі фармацэўтычных вытворчасцяў.
Латвійскі дыпламат выступіў за далейшы працяг працы над заключэннем пагадненняў аб лібералізацыі візавага рэжыму і рэадмісіі (зваротнага прыёму грамадзян, якія падлягаюць дэпартацыі).
Усходняе партнёрства і абарона Дзвіны
Абмеркавалі бакі і супрацоўніцтва ў фармаце Усходняга партнёрства — праект ЕС па развіцці інтэграцыйных сувязяў з Украінай, Малдовай, Азербайджанам, Арменіяй, Грузіяй і Беларуссю. Дзяржсакратар Латвіі заклікаў беларускі бок больш актыўна супрацоўнічаць у сферы аховы навакольнага асяроддзя і працягнуць працу над распрацоўкай чатырохбаковага пагаднення аб абароне басейна Заходняй Дзвіны, удзельнікамі якога таксама з'яўляюцца Еўрапейская камісія і Расія.
Пілдэговічс прапанаваў пераняць досвед Латвіі і ў сферы "арганізацыі дэмакратычных выбараў", а таксама нагадаў пра неабходнасць устанаўлення мараторыя на смяротнае пакаранне.
