МІНСК, 6 жні — Sputnik. Кінатэатр "Цэнтральны" запрашае гледачоў мультфільма "Таемнае жыццё хатніх жывёлаў" прыйсці разам з сабакамі, паведамілі Sputnik ва УП "Кінавідэапракат".
Адмысловы сеанс пройдзе 16 жніўня ўдзень. Для праходу на яго з сабакам трэба будзе купіць чацвераногаму сябру асобны білет. Аднак адміністрацыя кінатэатра "Цэнтральны" можа і не пусціць на фільм "Таемнае жыццё хатніх жывёлаў", калі вы прыйдзеце з вельмі ўжо буйным улюбёнцам.
"Вядома, мы спадзяемся, што прыйдуць з маленькімі сабачкамі, не з аўчаркамі. Іншых жывёл нельга прыводзіць — ні котак, ні пітонаў. Вы ўяўляеце, што было б з імі? Толькі маленькія сабачкі", — распавёў Sputnik дырэктар УП "Кінавідэапракат" Васіль Коктыш.
Паводле слоў кіраўніка прадпрыемства, з ініцыятывай правесці такі сеанс звярнуліся супрацоўнікі "Цэнтральнага", а ён вырашыў "не абмяжоўваць іх у ініцыятыве".
"На ўваходзе будзе адміністрацыя — з вялікім ці не выхаванымі жывёламі могуць і не пусціць. Цікава яшчэ, як будуць у зале паводзіць сябе жывёлы… Але я спадзяюся, што ўладальнікі сыдуць, калі нешта пойдзе не так", — працягваў суразмоўца Sputnik.
Падобная практыка, адзначыў Коктыш, прымяняецца па ўсім свеце, а ў Мінску пакуль запланаваная дзея — адзінкавая. Пасля сеансу перапынак паміж фільмамі будзе нават большым, чым звычайна — каб залу для гледачоў дакладна паспелі ачысціць і адмыць.
