Поўны брэнд: шукаем “беларускае” ў інтэрнет-крамах

© Photo : з сайта дызайнера heartforheartdollsЛялька-беларуска з калекцыі heartforheartdolls
Лялька-беларуска з калекцыі heartforheartdolls - Sputnik Беларусь
Падпісацца
Сайт адной з самых папулярных інтэрнэт-крамаў па запыце “Беларусь” выдае чатырнаццаць старонак тавараў.

МІНСК, 17 ліс — Sputnik. Кілімкі для мышкі ў выглядзе чырвона-зялёных сцягоў, футболкі I love Hrodno, беларускія "жалейкі" з трыснёга і нават банкноты з легендарнымі зайчыкамі за 1992 год — інтэрнэт-крамы проста перапоўненыя Беларуссю.

За стыльную Беларусь!

Некалькі гадоў таму японцы намалявалі анімэ Хеталія, у якім распавялі пра адносіны паміж краінамі як адносіны паміж людзьмі. У Хеталіі Расія не ладзіць з Амерыкай, Францыя п'е віно і піша вершы, а Нямеччына па старой памяці ўсім пагражае. Беларусь японцы не абмінулі ўвагай. Наша краіна — самы прыгожы персанаж анімэ. Сінявокая Беларусь, заломваючы рукі, прыстае да свайго брата Расіі, патрабуе ад яго вяселля.

Фанаты інцэсту ва ўсім свеце палюбілі Беларусь не толькі за прыгожыя вочкі і настойлівасць, але і за доўгія плацінавыя валасы, чорны бант і стыльную сукенку з шырокім поясам — так выглядае касцюм Беларусі на фестывалях анімэ-культуры. Фанаты Беларусі лёгка могуць набыць касцюм у інтэрнэце.

Самы бюджэтны варыянт інтэрнэт-крамы абяцаюць даставіць з Тайваня: за нейкіх 84 долара прыхільнікі могуць стаць уладальнікамі цёмна-сіняй сукенкі і белага фартуха. На Тайвані мяркуюць, што дадатковыя 68 долараў фанаты захочуць выдаткаваць на знакаміты плацінавы беларускі парык, каб выглядаць зусім па-беларуску.

Уніформа Беларусі — адзін з самых дарагіх касцюмаў Хеталіі. Пераапрануцца ў Беларусь на анімэ-фэсце даражэй, чым згуляць Расію, Украіну і нават Вялікабрытанію.

Чытайма па-беларуску

Сярод тавараў па запыту "Беларусь" цэлы шэраг кніжак, большасць з іх — гайды ці нарысы па беларускай гісторыі. Нечакана выявілася, што акрамя прадказальных нарысаў "Беларусу — апошняя дыктатура Еўропы", амерыканцаў цікавяць дзеянні салдатаў Вермахта на Беларусі. Тут жа невядома што робіць інструкцыя па кіраванні трактарам "Беларус", якую можна набыць за 37 даляраў.

Цікавая знаходка — мастацкі тэкст француза Франка Свек — "Adieu, My Belarus". Кніга распавядае пра жыццё беларускіх арыстакратаў, якія вымушаныя з'ехаць з Беларусі. Тут жа — кніга амерыканкі, у якой Беларусь уяўляецца не белай плямай на мапе, а планетай у космасе, населенай монстрамі. Адным словам, Беларусь значна распаляе фантазію замежнікаў.

Беларуска ў легінсах

Сярод чырвона-зялёных і бел-чырвона-белых падвесак, десяцідоларавага чарнічнага варэння "Зроблена ў Беларусі", шклянак ручной працы з беларускіх цягнікоў, гадзіннікаў маркі "Луч", дыскаў з беларускай нацыянальнай музыкай і іншых нацыянальных скарбаў выявілася лялька ў нацыянальным беларускім касцюме, што пазіцыянуе сябе як "вобраз усіх беларускіх дзяцей". Завуць яе Ліліян.

Яна — частка серыі цацак "Ад сэрца да сэрца" дызайнера з Чыкага Джыны Біб, якая выпусціла лялек-прадстаўніц шасці самых бедных краін свету. Акрамя беларускі ў серыю ўвайшлі лялька-эфіопка, мексіканка, індыянка, прадстаўніцы Лаоса і няўдалых рэгіёнаў ЗША. Ляльку-суайчынніцу амерыканцы прадаюць за 24 долара. Беларуска прадаецца з усім неабходным: у камплект уваходзяць завушніцы з імітацыяй рубінаў, чорныя нацыянальныя балеткі, такая ж нацыянальная чорная камізэлька з арнаментам і крыху менш за нацыянальныя чырвоныя легінсы. Ліліян — палітычна падкаваная лялька, яна вядзе онлайн-дзённік, у якім распавядае пра нягоды жыцця ў Беларусі: нічога новага — выключна голад, холад, безграшоўе і перыядычныя мітынгі. Дарэчы, ёсць і сверхмісія: долар ад продажу кожнай лялькі-беларускі сыходзіць на падтрымку беларускіх дзяцей.

Стужка навiн
0