МІНСК, 22 ліс — Sputnik. Большасць беларускіх грамадзян у студзені-кастрычніку 2016 года здолелі не перавысіць так званыя льготныя аб'ёмы спажывання электраэнергіі, але ў камунальным сектары з пачатку года поўнага ўзроўню аплаты не змог дамагчыся ні адзін рэгіён краіны, паведамілі Sputnik у Міністэрстве энергетыкі.
У Беларусі з лета 2014 года для грамадзян устаноўлены ліміты спажывання электраэнергіі, якую можна аплачваць па субсідыруемых дзяржавай тарыфах. Для кватэр такі аб'ём складае 150 кілават-гадзін у месяц. Уся астатняя спажытая электраэнергія аплачваецца па іншых, больш высокіх тарыфах.
"У студзені-кастрычніку 81,5% грамадзян не перавысілі "ільготныя" аб'ёмы электраспажывання. Пры гэтым для грамадзян, якія пражываюць у кватэрах з газавымі плітамі, гэты паказчык склаў 77,4%, для грамадзян, якія жывуць у кватэрах з электраплітамі — 85,9%", — паведамілі ў Мінэнерга.
Між тым, арганізацыямі камунальнай формы ўласнасці (у асноўным прадпрыемствы ЖКГ) за 10 месяцаў 2016 года ва ўсіх абласцях і Мінску не была забяспечана поўная аплата за адпушчаную энергію.
Па Брэсцкай вобласці ўзровень аплаты склаў 96,5%, па Віцебскай вобласці — 88,6%, па Гомельскай вобласці — 90,4%, па Гродзенскай вобласці — 94,6%, па Мінскай вобласці — 79,5%, па Магілёўскай вобласці — 87,9% і па горадзе Мінску — 97,4%.
У цэлым за 10 месяцаў спажыўцам рэспублікі адпушчана электрычнай і цеплавой энергіі на суму 6,9 мільярда рублёў, узровень аплаты склаў 95%. Запазычанасць спажыўцоў за пастаўленую ім энергію па стане на 1 лістапада 2016 года склала 834,2 мільёна рублёў, паведамілі ў Мінэнерга.
Там удакладнілі, што даўгі былі назапашаныя ў асноўным прамысловымі прадпрыемствамі. Горш за ўсё разлічваліся за энергарэсурсы прадпрыемствы Мінпрама.
