МІНСК, 18 сту — Sputnik. На пасаду рэктара ЕГУ прэтэндуюць 29 чалавек, прыём заявак быў афіцыйна завершаны апоўдні 17 студзеня, паведамілі ў Еўрапейскім гуманітарным універсітэце.
"Па выніках міжнароднага конкурсу на пасаду рэктара ЕГУ было атрымана 29 заявак", — гаворыцца ў паведамленні ВНУ.
Пост рэктара вызваліўся пасля сыходу ў адстаўку амерыканскага прафесара Дэвіда Поліка. Адстаўцы папярэднічала рашэнне другога па велічыні пасля Еўрапейскага саюза донара ЕГУ — Савета міністраў Паўночных краін — спыніць фінансаванне ўніверсітэта.
З 2011 года Савет штогод выдаткоўваў універсітэту прыкладна 550 тысяч еўра, што складала каля 18% фінансавай дапамогі ВНУ. Афіцыйна гэта рашэнне патлумачылі тым, што краінам не хапае грошай на бежанцаў, але адначасова намякнулі, што і ў самім універсітэце ёсць праблемы, з якімі варта было б разабрацца.
У верасні 2016 года часова выконваючым абавязкі рэктара быў прызначаны Ёрген Ёргенсэн, экс-дырэктар адміністрацыі Орхускага ўніверсітэта. Такое рашэнне прыняў агульны сход сузаснавальнікаў ЕГУ.
Ёргенсэн, а таксама прэзідэнт ЕГУ Анатоль Міхайлаў, старшыня Агульнага сходу сузаснавальнікаў ЕГУ і прэзідэнт фонду "Еўразія" Хортон Бібі-Сентэр, член Кіраўнічай рады ЕГУ Эва Осьнецка-Тамецка і трое прадстаўнікоў Сената ЕГУ ўваходзяць у камітэт, якому трэба будзе адабраць кандыдатаў на пасаду рэктара.
Еўрапейскі гуманітарны ўніверсітэт быў заснаваны ў Мінску ў 1992 годзе. Пасля закрыцця беларускімі ўладамі ў 2004 годзе працягнуў сваю працу ў Вільнюсе. Юрыдычна з'яўляецца літоўскім ВНУ, але арыентаваны па-ранейшаму пераважна на беларускіх грамадзян. Фінансуецца кааліцыяй міжнародных донараў.
