МІНСК, 3 лют — Sputnik. Ад рускай мовы адмаўляцца ні ў якім разе нельга, заявіў у пятніцу ў рамках "Вялікай размовы з прэзідэнтам" беларускі лідэр Аляксандр Лукашэнка.
Дэпутат Палаты прадстаўнікоў і намеснік кіраўніка Таварыства беларускай мовы Алена Анісім запытала кіраўніка пра стаўленне да дзяржаўных моў і прапанавала стварыць Нацыянальны ўніверсітэт з беларускай мовай навучання.
"Я вельмі акуратна стаўлюся да гэтага пытання. І дзякуй Богу, што ў нас у грамадстве гэта не стала каменем перапоны, а магло б быць, зыходзячы з таго, якую палітыку праводзіў той Вярхоўны савет (пачатку 1990-х — Sputnik)", — распавёў Лукашэнка.
Прэзідэнт назваў сваёй заслугай тое, што ён пагасіў напал у грамадстве з-за моўнага пытання. "Пакуль я прэзідэнт — я не дапушчу, каб мы кастылялі кагосьці па моўнай праблеме і дзялілі людзей па прыкмеце, ці ведаюць яны беларускую мову. Дрэнна гэта ці добра — час пакажа", — адзначыў кіраўнік дзяржавы.
"Толькі я супраць таго, каб фарсілі беларускай мовай. Не трэба гэта. Пройдзе час, мы навучымся размаўляць на беларускай мове і вельмі добра. Але я вас заклінаю і прашу: не адмаўляйцеся ад рускай мовы, ад свайго роднага", — заклікаў Лукашэнка.
Ідэю стварэння "Нацыянальнага ўніверсітэта" прэзідэнт падтрымаў, аднак заклікаў ставіцца да ідэі асцярожна і зыходзіць з жадання беларусаў — ці патрэбны ім такі ўніверсітэт, ці будзе туды конкурс. Ён прапанаваў прадумаць гэтае пытанне.
