МІНСК, 2 чэр — Sputnik. Купанне ў вадаёмах васьмі зон адпачынку абмежавана ў Беларусі, паведамілі ў Рэспубліканскім цэнтры гігіены, эпідэміялогіі і грамадскага здароўя.
Спецыялісты правялі абследаванне ўсіх зон рэкрэацыі, зацверджаных мясцовымі ўладамі.
"Лабараторна даследавана 1104 пробы вады, 46 з іх не адпавядалі ўстаноўленым гігіенічным нарматывам, у тым ліку 12 па мікрабіялагічных паказчыках — 1,1%, 34 па санітарна-хімічным — 3,1%", — распавялі ў цэнтры.
Суразмоўцы агенцтва праінфармавалі, што зараз у краіне абмежавана купанне на васьмі зонах рэкрэацыі. Спецыялісты растлумачылі, што дадзеныя зоны не адпавядаюць эпідэміялагічным крытэрыям бяспекі і/або знаходзяцца ў нездавальняючым санітарна-тэхнічным стане.
Так, у Брэсцкай вобласці абмежавана купанне дзяцей на чатырох зонах рэкрэацыі:
- пляж "Цэнтральны", правы бераг р.Мухавец, г. Брэст;
- пляж "Цэнтральны", левы бераг р.Мухавец, г. Брэст;
- пляж санаторыя "Надзея" р.Мухавец, Жабінкаўскі раён;
- пляж гарадскога парку г.Жабінка.
У Магілёўскай вобласці купанне дзяцей і дарослых забаронена на чатырох зонах рэкрэацыі:
- зона рэкрэацыі р. Днепр у г. Магілёве;
- зона рэкрэацыі на Грэбенеўскім возеры г. Магілёва;
- пляж на р. Днепр в. Палыкавічы, Магілёўскі раён;
- пляж на Вільчыцкім вадасховішчы в. Вільчыцы, Магілёўскі раён.
