Самалёт прэзідэнта Беларусі Аляксандра Лукашэнкі

Былы беларускі "Борт №1" выстаўлены на продаж

11
(абноўлена 15:07 05.11.2018)
Прадавец самалёта, які будзе выстаўлены на аўкцыёне, не выдае гісторыю паветранага судна.

МІНСК, 5 ліс - Sputnik. Былы беларускі "Борт №1" - самалёт Ту-154М, на якім лётала вышэйшае кіраўніцтва краіны, выстаўлены на продаж, інфармацыю аб маючых адбыцца таргах размясціла газета "Звязда".

Плануецца, што таргі па продажы паветранага судна TУ-154M (год выпуску - 1995, бартавы нумар EW-85815) адбудуцца 5 снежня 2018 года ў Нацыянальным аэрапорце Мінск, з пачатковым коштам больш за 2 мільёны долараў. У сетцы інтэрнэт з'явілася інфармацыя аб тым, што гэта паветранае судна - былы беларускі "Борт №1", на якім лётаў кіраўнік дзяржавы Аляксандр Лукашэнка.

Уласнік самалёта, які яго прадае, не каментуе гэтую інфармацыю.

"Мы можам даць інфармацыю аб бартавых характарыстыках паветранага судна, якое выстаўлена на таргі", - сказаў Sputnik у тэлефоннай размове прадстаўнік ААТ "Авіякампанія "Белавія". Паводле яго слоў, у яго няма паўнамоцтваў даваць каментары, для якіх мэт раней выкарыстоўваўся самалёт, пра які ідзе гаворка.

Гэты Ту-154М быў выпушчаны ў 1995 годзе, як сцвярджаюць інтэрнэт-крыніцы, беларускі прэзідэнт выкарыстоўваў яго ў сярэдзіне 2010-х.

Былы "Борт №1" "засвяціўся" ў СМІ восенню 2016 года, калі беларускі прэзідэнт наведваў з афіцыйным візітам Кітайскую Народную Рэспубліку. Без дазапраўкі самалёт можа праляцець крыху менш за чатыры тысячы кіламетраў, а адлегласць ад Мінска да Пекіна - больш за шэсць тысяч. Прамежкавую пасадку беларускі самалёт тады рабіў у Новасібірску, і спотэры ў той момант убачылі яго.

11
Каментары