МІНСК, 13 лют - Sputnik. Новая дзяржаўная аналітычная структура з'явіцца ў Беларусі - Беларускі інстытут стратэгічных даследаванняў, паведамілі ў прэс-службе кіраўніка дзяржавы.
Адпаведны ўказ, які прадугледжвае фарміраванне ведамства, падпісаў 12 лютага беларускі прэзідэнт Аляксандр Лукашэнка.
"Інстытут створаны ў мэтах інфармацыйна-аналітычнага забеспячэння дзейнасці дзяржаўных органаў па стратэгічных напрамках знешняй і ўнутранай палітыкі", - сказалі ў прэс-службе.
Там таксама адзначылі, што яго спецыялісты будуць займацца навуковымі даследаваннямі, вывучаць міжнародныя тэндэнцыі і працэсы ў сацыяльнай сферы, палітыцы, эканоміцы, а таксама аналізаваць выклікі ў інфармацыйнай прасторы.
Інстытут будзе распрацоўваць рэкамендацыі для ўдасканалення дзяржаўнай палітыкі Беларусі, а таксама ўдзельнічаць ва ўзгадненні стратэгічных дакументаў - такіх як розныя канцэпцыі, стратэгіі і дактрыны.
Плануецца, што для даследаванняў будуць прыцягвацца вядучыя эксперты, якія займаюцца пытаннямі знешняй і ўнутранай палітыкі, IT і нацбяспекі. Інстытут збіраецца супрацоўнічаць з дзяржаўнымі органамі, міжнароднымі арганізацыямі, беларускімі і замежнымі аналітычнымі цэнтрамі.
Кіраваць інстытутам будзе Алег Макараў, які да гэтага часу з'яўляўся начальнікам інфармацыйна-аналітычнага ўпраўлення дзяржаўнага сакратарыята Савета бяспекі.
