Лукашэнка зацвердзіў Канцэпцыю інфармбяспекі Беларусі

Лукашэнка зацвердзіў Канцэпцыю інфармбяспекі Беларусі

63
(абноўлена 09:16 19.03.2019)
Зараз дзяржаўным органам трэба будзе кіравацца палажэннямі дакумента, а вынікі рэалізацыі канцэпцыі знойдуць адлюстраванне ў штогадовым дакладзе прэзідэнту пра стан нацбяспекі.

МІНСК, 19 сак - Sputnik. Прэзідэнт Аляксандр Лукашэнка падпісаў пастанову Савета бяспекі "Аб Канцэпцыі інфармацыйнай бяспекі Рэспублікі Беларусь", паведамілі ў прэс-службе кіраўніка дзяржавы.

Дзяржорганам і іншым арганізацыям даручана кіравацца палажэннямі канцэпцыі на практыцы, а вынік рэалізацыі дакумента знойдзе адлюстраванне ў штогадовым дакладзе прэзідэнту аб стане нацыянальнай бяспекі і мерах па яе ўмацаванні.

Позірк у будучыню

"У канцэпцыі ўлічаны ўсе заўвагі і прапановы сябраў Савета бяспекі, якія паступілі падчас разгляду праекта канцэпцыі на пасяджэнні 12 сакавіка. У прыватнасці, узмоцнены палажэнні аб падрыхтоўцы кадраў у галіне забеспячэння інфармацыйнай бяспекі, выкарыстання сусветных рэйтынгаў для ацэнкі яе стану, абароне камерцыйнай, прафесійнай, банкаўскай таямніц", - адзначылі ў прэс-службе.

Там дадалі: у дакуменце таксама канкрэтызавана, што рэагаванне на рызыкі і выклікі ў інфасферы павінна выконвацца ўсімі без выключэння дзяржорганамі і арганізацыямі ў адпаведнасці з напрамкам іх дзейнасці.

"Канцэпцыя інфармацыйнай бяспекі Беларусі - гэта сістэма афіцыйных поглядаў на сутнасць і змест забеспячэння нацбяспекі ў інфармацыйнай сферы, у якой вызначаюцца стратэгічныя задачы і прыярытэты ў галіне забеспячэння інфармацыйнай бяспекі", - растлумачылі ў прэс-службе.

Новы дакумент заснаваны на геапалітычных інтарэсах краіны, яе месцы і ролі ў сучасным свеце. Акрамя гэтага, канцэпцыя грунтуецца на пагадненнях аб супрацоўніцтве ў галіне забеспячэння інфармбяспекі дзяржаў СНД, АДКБ, двухбаковых пагадненнях і іншых абавязацельствах Беларусі ў галіне міжнароднай інфармацыйнай бяспекі. Таксама дакумент улічвае асноўныя палажэнні актаў міжнародных арганізацый, у тым ліку рэзалюцый Генасамблеі ААН і рэкамендацыі АБСЕ.

Практычны дапаможнік

Варта адзначыць, што канцэпцыя забяспечвае комплексны падыход да праблемы інфармбяспекі.

У ёй знайшлі адлюстраванне цяперашнія выклікі і пагрозы, якія ёсць у інфасферы і прадстаўляюць небяспеку для канстытуцыйных асноў і жыццядзейнасці дзяржаў, а менавіта маніпуляванне масавай свядомасцю, дыскрэдытацыя ідэалаў і каштоўнасцяў, размыванне нацыянальнага суверэнітэту, няўстойлівасць інфармацыйнай інфраструктуры і іншыя.

Дакумент для ўсіх

"Па сутнасці Канцэпцыя прадстаўляе сабой сучасны палітычны акт, нацэлены на ўсёабдымнае развіццё Беларусі як суверэннай, дэмакратычнай, сацыяльнай дзяржавы. Змест дакумента прадстаўлены ўвазе дзяржаўных органаў, грамадскасці, грамадзян, саюзнікаў і партнёраў Беларусі, іншых суб'ектаў міжнародных адносін", - растлумачылі ў прэс-службе прэзідэнта.

Дарэчы, у дакуменце Беларусь пазіцыянуецца як міралюбная дзяржава, якая разлічвае на цывілізаванае рашэнне ўсіх пытанняў глабальнай і рэгіянальнай бяспекі, развіццё чалавечага патэнцыялу. Пры гэтым дакумент арыентаваны на ўцягванне ў забеспячэнне інфармацыйнай бяспекі ўсіх дзяржаўных органаў і арганізацый, грамадзянскай супольнасці, бізнесу, прадстаўнікоў навукі, адукацыі і культуры.

Нагадаем, праект канцэпцыі абмяркоўваўся на нарадзе ў прэзідэнта тыдзень таму - 12 сакавіка. Тады Лукашэнка пазітыўна выказаўся пра стварэнне дакумента.

63
Тэги:
Беларусь, Аляксандр Лукашэнка, Кібербяспека

Грамадства