МІНСК, 20 сне - Sputnik. Праезд на цягніках унутры краіны падаражэе ў Беларусі, паведамілі ў прэс-службе міністэрства антыманапольнага рэгулявання і гандлю.
Павышэнне коштаў на праезд прадугледжана адпаведнай пастановай МАРГ ад 12 снежня. У дакуменце сказана, што тарыфы на перавозку пасажыраў на гарадскіх лініях вырастуць на 10 капеек, на рэгіянальных і міжрэгіянальных лініях - на 5%.
Напрыклад, праезд цягнікамі гарадскіх ліній ад Мінска да Заслаўя ў межах аднаго тарыфнага пояса, ад Мінска да Смалявічаў праз Гарадзішча ў межах двух паясоў падаражэе на 10 капеек. Кошт квітка на цягнік рэгіянальных ліній эканамкласа з Мінска ў Рудзенск вырасце на 5 капеек, у Смалявічы - на 4 капейкі, а да Заслаўя - на 3 капейкі. Кошт праезду ў цягніку бізнес-класа ад Мінска да Бабруйска павялічыцца на 32 капейкі, а да Оршы - на 39 капеек.
Акрамя таго, пастанова МАРГ прадугледжвае павелічэнне тарыфаў на перавозку багажу і грузаў у сярэднім на 5%.
Да гэтага ў апошні раз тарыфы на перавозку пасажыраў на чыгунцы павялічвалі ў сакавіку-красавіку мінулага года.
"На сённяшні дзень ўзровень кампенсацыі насельніцтвам затрат на аказанне ўнутрырэспубліканскіх пасажырскіх перавозак чыгуначным транспартам не дасягае 20 працэнтаў. Бюджэтнае субсідаванне ў рэспубліцы на гэтыя паслугі не ажыццяўляецца", - падкрэслілі ў МАРГ.
