МІНСК, 2 ліс - Sputnik. Ёсць надзея, што ўздым захворвання на каронавірус у Беларусі не будзе доўжыцца да лютага наступнага года, пра гэта заявіў старшыня Гродзенскага аблвыканкама Уладзімір Каранік ў эфіры СТБ.
"Калі мы разумеем: цяпер у структуры захворвання рэспіраторнымі віруснымі інфекцыямі вядучую ролю адыгрывае каронавірус, то мы спадзяемся, што з цягам часу пройдзе пераразмеркаванне, і мы зноў будзем у большай меры бачыць нашы стандартныя, не скажу родныя, але стандартныя вірусы. Гэта адэнавірусы, гэта вірусы грыпу", - патлумачыў былы кіраўнік Міністэрства аховы здароўя.
Паводле яго слоў, медыкі разлічваюць, што ў гэтым сезоне дзякуючы паспяховай прышчэпачнай кампаніі, эпідэміі грыпу не будзе.
"Але гэта будуць тыя рэспіраторныя вірусы, з якімі мы прывыклі мець справу пастаянна. Таму вельмі спадзяемся, што ўздым каронавіруснай інфекцыі не працягнецца да лютага, і мы будзем бачыць у бліжэйшыя паўтара-два месяцы ўжо лічбы зніжэння захворвання", - падкрэсліў Каранік.
Па дадзеных Міністэрства аховы здароўя на 1 лістапада, у Беларусі выявілі 99 459 выпадкаў каронавіруса, пры гэтым ахвярамі хваробы сталі 985 чалавек. Толькі за суткі з 31 кастрычніка на 1 лістапада захварэлі яшчэ 977 чалавек.
З 27 кастрычніка ў Беларусі фіксуецца штодня больш за 900 выпадкаў захворвання. Рэкорд захворвання, усталяваны 29 красавіка, быў пабіты 29 кастрычніка - плюс 984 хворых за суткі.
