МІНСК, 21 кра — Sputnik. Цырымонія запальвання агню XXXI летніх Алімпійскіх гульняў, якія пройдуць сёлета ў Рыа-дэ-Жанейра, адбылася ў Старажытнай Алімпіі.
Пасля рытуалу ў старажытнагрэчаскай святыні — храме Геры — пачнецца эстафета алімпійскага агню, якая ў першыя дні пройдзе па тэрыторыі Грэцыі, а 27 красавіка фармальна будзе перададзена дэлегацыі аргкамітэта Рыа-2016.
Па традыцыі пачынае эстафету грэцкі спартовец. Гэтым разам першым панясе паходню чэмпіён свету 2015 гада па спартыўнай гімнастыцы 25-гадовы Элефтэрыёс Петруніас. Пасля свайго этапа эстафеты ён каля помніка заснавальніку сучаснага алімпійскага руху барону П'еру дэ Кубертену перадасць алімпійскі агонь бразільцу — двухразоваму алімпійскаму чэмпіёну па валейболу Джавані Гавіа. У Грэцыі агонь пранясе і адзін з бежанцаў, прадстаўнік дзесяткаў тысяч з тых, хто чакае ў краіне вырашэння свайго лёсу.
У Бразіліі эстафета пачнецца 3 мая ў сталіцы краіны Бразіліа. Паходню па тэрыторыі краіны-гаспадыні Гульняў пранясуць 12 тысяч чалавек. Завершыцца эстафета ў Рыа-дэ-Жанейра 25 красавіка, у дзень адкрыцця Алімпіяды, на стадыёне Маракана. Галоўны сімвал Алімпійскіх гульняў будзе гарэць у чары на стадыёне да заканчэння гульняў 21 жніўня.
