МІНСК, 29 сак — Sputnik. Еўрапейскія гульні 2019 года дапамогуць Беларусі заявіць пра сябе на сусветнай арэне, умацаваць свой імідж, заявіў спартыўны кансультант Еўрапейскіх алімпійскіх камітэтаў (ЕАК) Макіс Асімакопулас.
У чацвер завяршаецца візіт у Беларусь дэлегатаў Нацыянальных алімпійскіх камітэтаў краін Еўропы. Напярэдадні прадстаўнікі 20 НАК Старога Свету і ЕАК азнаёміліся з ходам падрыхтоўкі Мінска да Еўрапейскіх гульняў 2019 года: госці наведалі спартыўныя аб'екты і месцы пражывання атлетаў. Галоўны кансультант ЕАК Пірс О'Каллаган заявіў, што дэлегаты засталіся задаволеныя ходам падрыхтоўкі да маштабнай спартыўнай падзеі.
"Для Беларусі правядзенне спаборніцтваў падобнага маштабу — гэта выдатны шанец заявіць пра сябе на сусветнай арэне, умацаваць свой імідж як па-сапраўднаму сучаснай спартыўнай дзяржавы, і з боку ЕАК мы гатовыя аказваць усялякую дапамогу і падтрымку для паспяховай рэалізацыі гэтага значнага праекта", — сказаў Асімакопулас.
Ён дадаў, што прадстаўнікі НАК, якія прыбылі ў сталіцу II Еўрапейскіх гульняў, засталіся прыемна здзіўленыя ўбачаным. Асімакопулас удакладніў, што дэлегатаў уразіў Мінск, а зносіны з супрацоўнікамі аргкамітэта "ўсялялі ў іх упэўненасць, што ўсё пройдзе паспяхова". Прадстаўнікі НАК пераканаліся, што "за знаходжанне тут іх спартыўных дэлегацый перажываць не варта".
"Усе спартыўныя аб'екты знаходзяцца ў поўнай гатоўнасці альбо на яе завяршальнай стадыі. Мы пабывалі таксама ў вёсцы спартсменаў. Яна размяшчаецца ў вельмі ўдалым месцы. Усё вельмі кампактна. Я думаю, што ўмовы знаходжання там будуць вельмі камфортнымі. Прынамсі, прадстаўнікі НАК не выказалі ніякіх крытычных заўваг. Яна будзе яшчэ трохі дапрацавана з улікам пажаданняў, бо ў Мінск прыедуць элітныя спартсмены", — працягнуў ён.
Па словах Асімакопуласа, правядзенне Дня адчыненых дзвярэй дазволіла еўрапейскім гасцям меркаваць, што ўсе недахопы будуць аператыўна ліквідавацца.
II Еўрапейскія гульні пройдуць у Мінску з 21 па 30 чэрвеня 2019 года на 12 спартыўных аб'ектах, у спаборніцтвах прымуць удзел больш за 4000 атлетаў з 50 краін. У праграму ўключаны 15 відаў спорту. Спаборніцтвы ў дзесяці відах спорту стануць кваліфікацыйнымі да XXXII Алімпійскіх гульняў 2020 года ў Токіа.
Міжнароднае інфармацыйнае агенцтва і радыё Sputnik з'яўляецца інфармацыйным партнёрам Еўрапейскіх гульняў-2019.
