МІНСК, 3 ліп — Sputnik. Старшыня праўлення футбольнага клуба "Дынама-Брэст", легендарны аргентынскі нападаючы Дыега Марадона прапанаваў бясплатна трэніраваць каманду Аргентыны, паведамляе РІА "Новости".
Аргентынскія футбалісты завяршылі выступленне на Чэмпіянаце свету па футболе ў Расіі, прайграўшы ў 1/8 фіналу зборнай Францыі з лікам 3:4. Марадона прысутнічаў на ўсіх матчах Аргентыны ў Расіі і актыўна падтрымліваў сваю каманду.
Цяперашні настаўнік зборнай Хорхэ Сампаолі, па дадзеных СМІ, пакіне каманду з-за нездавальняючага выступлення на мундыялі.
"Так, я гатовы працаваць бясплатна. Я не буду прасіць нічога ўзамен", — сказаў Марадона.
Марадона дадаў, што яму вельмі крыўдна пасля паразы ад французаў. "Таму што ўсё, што мы пабудавалі з такой цяжкасцю, лёгка разбурылася", — растлумачыў ён.
Экс-футбаліст раней узначальваў аргентынскую зборную. На ЧС-2010 у ПАР каманда пад яго кіраўніцтвам дайшла да чвэрцьфіналу турніру, дзе прайграла Германіі (0:4).
У маі гэтага года Марадона заняў пасаду старшыні праўлення ФК "Дынама-Брэст". Як чакаецца, новы бос берасцейцаў павінен прыехаць у Беларусь пасля завяршэння ЧС-2018.
