Мінскі паўмарафон

Дзевятоўскі: на Мінскі паўмарафон нікога не заганяем

14
(абноўлена 10:11 03.08.2018)
У верасні на дыстанцыю выйдуць 35 тысяч бегуноў, што на пяць тысяч больш, чым у 2017 годзе.

МІНСК, 3 жні — Sputnik. Арганізатары не заганяюць гараджан на Мінскі паўмарафон, паведаміў журналістам дэпутат Палаты прадстаўнікоў Нацыянальнага сходу Беларусі Вадзім Дзевятоўскі.

Паводле яго слоў, напрыклад, студэнты выходзяць на дыстанцыю па ўласным жаданні.

"Мы рады, што бяжыць шмат моладзі. Карыстаючыся выпадкам, хачу сказаць, што ніхто нікога не заганяе. Людзі самі, студэнты з задавальненнем прыходзяць", — сказаў Дзевятоўскі.

Арганізатары паўмарафону адзначаюць, што ажыятаж вакол яго расце. Ужо пададзена 2263 заяўкі. У цэлым дынаміка рэгістрацыі ўдзельнікаў у два разы перавышае мінулагоднюю. Будзе больш замежнікаў — ужо пададзена больш за 600 заявак. А наогул чакаюць, што замежных бегуноў будзе больш за тысячу.

"Самая актыўная Расія — пададзена 333 заяўкі. Вялікабрытанія — 12 чалавек, Германія — 14, Польшча — 27, ЗША — 9. Ёсць у спісе Канада, Аўстралія, Эквадор, Літва, Латвія, Украіна. Важна падкрэсліць: едуць за свой кошт. Мне здаецца, Мінску гэта будзе эканамічна выгадна ", — адзначыў Дзевятоўскі.

Сярэдні чэк замежніка, як было падлічана раней, у Мінску складае 100 долараў ЗША ў дзень.

Што новага?

У сувязі з ажыятажам колькасць удзельнікаў паўмарафон вырашылі павялічыць да 35 тысяч. У мінулым годзе бегуноў было на пяць тысяч менш. Арганізатары лічаць, што гэта не мяжа. Для параўнання: Лонданскі марафон прымае больш за 30 тысяч спартсменаў, Берлінскі — 40 тысяч.

"У нас няма сумневу, што будзе аншлаг. У першы год бегла каля 350 замежнікаў. Гэта таксама быў поспех. Лондан, Берлін, Нью-Ёрк ведаюць усе аматары бегу. Вядома, калі на карце з'яўляецца новая кропка, з аднаго боку, яна цікавая, з другога — пра яе трэба даведацца. Тым больш Беларусь толькі зараз становіцца больш вядомай. Раней, на жаль, людзі нават баяліся ехаць сюды, прапаганда такая нездаровая была", — сказаў дэпутат.

У Мінск прыедуць знакамітыя спартсмены, але пакуль іх імёны не ўдакладняюцца.

"Не магу назваць канкрэтныя прозвішчы, вядуцца перамовы. У нас ёсць попыт. Мы сёння ўжо самі выбіраем, каго запрасіць. Вялікую ролю будзе адыгрываць прызавы фонд. Эліта арыентуецца на заробак. Я думаю, што падваенне прызавога фонду паўплывае на ўзровень спартсменаў, якія прыедуць", — сказаў Дзевятоўскі.

Сумы прызавых фондаў таксама пакуль не выдаюцца, але, як адзначыў дэпутат, яны вылічаюцца тысячамі долараў. Усім удзельнікам, якія не занялі прызавога месца, уручаць памятныя медалі.

З беларусаў чакаецца, што ў паўмарафоне прыме ўдзел славутая лёгкаатлетка Вольга Мазуронак.

Новая траса

Дыстанцыю галоўнай трасы Мінскага паўмарафона таксама вырашылі змяніць: старт, як звычайна, будзе каля Палаца спорту, затым бегуны выйдуць на праспект Пераможцаў, дайшоўшы да "Мінск-Арэны".

Арганізатары тлумачаць, што маршрут быў скарэкціраваны для зручнасці ўдзельнікаў, якім раней даводзілася ісці два кругі, што маральна няпроста. Асобна будзе дадзены старт на дыстанцыях у пяць і 10 кіламетраў.

Па словах Дзевятоўскага, Мінскі паўмарафон рыхтуецца атрымаць срэбны статус, зараз чакаюць камісію. Дэпутат запэўніў, што ўсе ўмовы для атрымання статусу выкананы.

"Мы маглі б атрымаць яго ў мінулым годзе. Адзін нюанс прапусцілі — колькасць элітных спартсменаў. Галоўныя пытанні — бяспекі, культуры арганізацыі забегу, электронныя сістэмы, яны ў нас на вышэйшым узроўні", — сказаў ён.

Дабрачыннасць

У рамках паўмарафона пройдзе благозабег. На дыстанцыю выйдуць прадстаўнікі дабрачыннага фонду "Шанс", Беларускага дзіцячага хоспіса, супольнасці "Крылы анёлаў".

Вядуцца перамовы з фондам рэабілітацыі, якім кіруе "беларускі Нік Вуйчыч", прадпрымальнік Аляксей Талай. Частка выручаных сродкаў будзе перададзена тым, хто адчувае патрэбу.

Мінскі паўмарафон праводзіцца з 2015 года. Ён пройдзе ў беларускай сталіцы 9 верасня.

14
Тэги:
спорт, Мінскі паўмарафон, Вадзім Дзевятоўскі, Мінск
Каментары