Арына Сабаленка

Сабаленка апусцілася на 15 месца ў рэйтынгу WTA

9
(абноўлена 09:51 15.10.2018)
Беларуская тэнісістка страціла рэкордную для сябе адзінаццатую пазіцыю ў рэйтынгу Жаночай тэніснай асацыяцыі.

МІНСК, 15 кас - Sputnik. У абноўленай версіі рэйтынгу WTA беларуская тэнісістка Арына Сабаленка размясцілася на 15 месцы ў агульным заліку.

На мінулым тыдні перад стартам турніру ў кітайскім Цяньцзіне першая ракетка Беларусі займала рэкорднае для сваёй кар'еры 11 месца ў рэйтынгу лепшых тэнісістак свету.

У Цяньцзіня Арына Сабаленка прайграла ў чвэрцьфінале турніру, і яе пазіцыя ў рэйтынгу змянілася. Яна цяпер не зможа прыняць удзел у выніковым турніры ў Сінгапуры (15-21 кастрычніка), дзе выступяць восем лепшых тэнісістак.

Таксама стала вядома, што беларуская тэнісістка з-за праблем са здароўем знялася з турніру "Кубак Крамля", які пройдзе 13-21 кастрычніка.

Першае месца ў рэйтынгу Жаночай тэніснай асацыяцыі займае румынка Сімона Халеп, другі радок за Каралін Вазняцкі з Даніі, на трэцім месцы размясцілася нямецкая тэнісістка Ангеліка Кербер.

У першай сотні тэнісістак свету ёсць яшчэ тры прадстаўніцы Беларусі. Аляксандра Сасновіч знаходзіцца на 31 радку рэйтынгу, былая першая ракетка свету Вікторыя Азаранка - на 56 месцы, а Вера Лапко займае 62 пазіцыю.

9
Тэги:
Тэніс, Арына Сабаленка
Каментары