МІНСК, 7 сту - Sputnik. Хакейная каманда Аб'яднаных Арабскіх Эміратаў стала бронзавым прызёрам XVI Каляднага турніру сярод аматараў у Мінску.
Матч за бронзавыя медалі адбыўся днём у аўторак 7 студзеня на лёдзе "Чыжоўскае-Арэны": прадстаўнікі Эміратаў змагаліся за ўзнагароды з камандай Фінляндыі.
Лік ужо на 6-й хвіліне гульні адкрылі фіны - вызначыўся Самі Кар'ялайнен. У другім перыядзе каманда ААЭ зраўняла лічбы на табло, а затым і выйшла наперад.
Вырашальнай стала трэцяя 20-хвілінка: фінскія хакеісты здолелі адыграць адну шайбу (2:2), пераможны гол у сустрэчы забіў на 58-й хвіліне Максім Захараў - 3:2.
