МІНСК, 17 жні — Sputnik. "Стары Ольса" запісалі новы альбом і праз тыдзень адправяцца ў трэці па ліку тур па ЗША. Канцэрты ў штатах пройдуць з 23 жніўня па 23 кастрычніка.
Гэтым разам "Стары Ольса" выступяць у 15 штатах ад заходняга да ўсходняга ўзбярэжжа на розных фестывалях, а таксама з сольнымі канцэртамі. Як і ў папярэдніх турах гурт будзе весці дзённік свайго падарожжа ў сацыяльных сетках. Калі вам цікава, што такое амерыканскія гастролі, падрабязнасці жыцця на колах, на сцэне і за кулісамі, падпісвайцеся на #СтарыОльсаUSA у ВК, Facebook, Instagram.
Альбом "Вада, хмель і солад" — спроба аднавіць дух старажытнага застолля, паказаць, як бавілі час нашыя продкі, што спявалі за святочным сталом. Але, разам з тым, у альбоме і сур'ёзныя песні на гістарычную тэматыку, і балады.
"Застолле — гэта мастацтва. Нашы продкі былі вельмі здатныя да застолляў, мелі добры густ і імпэт да іх. Вада, хмель і солад — тры неабходныя складнікі самага старога, сапраўднага і ўсімі любімага напою піва, якое аб'ядноўвае ўсе саслоўі, усе народы і ўзросты", — распавялі музыкі пра новы альбом.
Альбом цалкам адпавядае тэматыцы застолляў — ён напоўнены жартоўнымі песнямі, канешне, песнямі пра піва, рыцарскімі і рэлігіёзнымі.
"Вада, хмель і солад" — не проста новы альбом, гэта грунтоўная праца гурта на працягу апошніх некалькіх гадоў. Воляй лёсу, сустрэч і знаходак збіраўся матэрыял для гэтага альбома, апрацоўваўся, крышталізаваўся на канцэртах. І, нарэшце, запісаны ў студыі", — дадалі музыкі.
Прэзентацыя альбома адбудзецца падчас тура гурта ў ЗША і 19 лістапада ў Мінску ў Палацы прафсаюзаў.
