МІНСК, 14 сне — Sputnik. Даследчыкі квантавай лабараторыі штучнага інтэлекту Google апублікавалі вынікі выпрабаванняў кампутара D-Wave 2X. Тэкст паказаў, што D-Wave вырашыў пастаўленую задачу з хуткасцю ў 100 мільёнаў разоў вышэй, чым традыцыйны кампутар з адным працэсарам.
Грамадскасць вырашыла, што карпарацыя вынайшла такі жаданы квантавы кампутар, але ж у Беларускай Акадэміі навук такі вынік абверглі.
"Кампутар, які вырабляецца кампаніяй D-Wave не з'яўляецца паўнавартасным квантавым кампутарам. Яго нельга праграмаваць, ён створаны пад рашэнне адной задачы. Так, ён з ёй спраўляецца нашмат хутчэй звычайнага кампутара, але ўсё ж гэта пакуль толькі прататып", — патлумачыла для Sputnik навуковы сакратар Інстытута фізікі НАН Беларусі Яна Кароль.
Спадарыня Кароль дадала — тэхналагічна кампутар рэалізаваны на звышправодзячых элементах — гэта значыць, ён можа працаваць толькі пры звышнізкіх тэмпературах.
"Іншы варыянт рэалізацыі — на NV-цэнтрах у алмазе. Такі кампутар можа працаваць пры пакаёвай тэмпературы. Цяпер у нас у інстытуце вядуцца працы як раз па распрацоўцы квантавых кампутараў на NV-цэнтрах у алмазе", — дадала суразмоўца Sputnik.
Грамадскасць занепакоілася: маўляў, калі б Google займеў сапраўдны квантавы кампутар, дык гэта значыла б, што карпарацыя цяпер мае магчымасць справіцца з любым відам шыфроўкі. Спадарыня Кароль супакойвае: нават калі аднойчы і будзе выраблены кампутар, здольны на нешта падобнае, дык "квантавая крыптаграфія вам у дапамогу — яе ніхто ніколі не расшыфруе". Ёю, дарэчы, у інстытуце таксама займаюцца — разам з аўстрыйцамі. Гэтым годам у замежныя сябры Акадэміі навук абралі якраз прэзідэнта аўстрыйскай Акадэміі навук Антона Цайлінгера.
У ТОП-10 вынікаў Акадэміі навук за мінулы год, трапіў і Інстытут фізікі. Сумесна з Інстытутам фізіка-арганічнай хіміі, супрацоўнікі інстытута знайшлі шлях стварэння цвёрдацельных квантавых кампутараў на аснове алмаза. Знойдзены "астравок стабільнасці" ў становішчы ізатопа вугляроду 13С адносна NV-цэнтра ў алмазе, для якога час кагерэнтнасці ядзернага спіна 13С пры пакаёвай тэмпературы складае дзесяткі хвілін.
Папросту кажучы, гэта дазваляе значна павялічыць лік лагічных аперацый, якія можа выканаць кампутар.
