МІНСК, 23 ліс — Sputnik. Беларусь можа стаць "новай Швейцарыяй" у тэхналогіі блокчэйн, заявіў у чацвер журналістам у Мінску заснавальнік Blockchain Tech Corp. і Bitcoin Center NYC Нік Спэнас.
Вядомы ва ўсім свеце распрацоўшчык блокчэйн-прадуктаў, Спэнас прыехаў у Мінск для ўдзелу ў першай міжнароднай канферэнцыі па гэтай тэхналогіі, якая пройдзе ў сталіцы рэспублікі ўжо ў пятніцу.
"Я веру, што Беларусь — гэта вельмі важная краіна. Нейкі час яна была ў цені іншых краін. Але я ведаю, што тут шмат разумных людзей, яна багатая чалавечымі рэсурсамі. Я веру, што Беларусь можа стаць новай Швейцарыяй усёй планеты. На працягу наступных года або палутара", — заявіў Спэнас.
Заснавальнік Blockchain Tech Corp. упэўнены, што праграмісты "становяцца новымі банкірамі".
"У той час як банкіры занятыя абаронай састарэлай мадэлі бізнесу. Найбуйнейшыя банкі свету часта кажуць аб блокчэйне і нешта робяць, але іх першая задача — не мяняць бізнэс-мадэлі", — адзначыў ён.
Спэнас мяркуе, што чым больш беларусы будуць ведаць пра тэхналогію блокчэйн, крыптавалюты, smart-кантракты, тым хутчэй краіна патрапіць на лідзіруючыя пазіцыі ў сферы развіцця тэхналогій і іх прымянення.
Эксперты ў сферы тэхналогій таксама выказаліся аб падрыхтоўцы прэзідэнцкага "дэкрэта аб ПВТ", падпісанне якога чакае ўся IT-галіна рэспублікі. Мяркуецца, што дакумент увядзе ў прававое поле і блокчэйн, і крыптавалюты.
"Тое, што да гэтага часу адсутнічаюць спецыяльныя законы, паказвае, што Беларусь думае, асэнсоўвае гэта, а не рэагуе імгненна — каб забараніць, як у многіх краінах свету. Тут шмат адэкватных і глыбока думаючых людзей у дзяржаўным апараце", — выказаўся арганізатар канферэнцыі, сузаснавальнік кампаніі Acumira LLC. Віктар Шаманоўскі.
Спецыялісты дадалі: тое, што пытанні рэгулявання і ўкаранення блокчэйна ў Беларусі вырашаюцца павольна і з глыбокім аналізам — прыкмета таго, што ў краіне ўсё робяць правільна.
