Інцыдэнт адбыўся ў мінулую нядзелю ў адным з магазінаў у Крупках, распавялі ва УУС Мінаблвыканкама. Трое мужчын зайшлі ў пусты гандлёвы аб'ект, прычым два з іх адцягвалі ўвагу прадаўца, якая на той момант знаходзілася ў зале, а трэці падышоў да касы, адкрыў яе і забраў выручку. Усяго з касы было выкрадзена 600 рублёў.
Прама над касай усталяваная камера відэаназірання, якая і захавала момант крадзяжу. Пасля таго, як зламыснікі сышлі, касір заўважыла прапажу і патэлефанавала ў міліцыю, распавёўшы праваахоўнікам прыкметы мужчын.
Міліцыянты хутка вылічылі зламыснікаў і затрымалі ўсіх траіх — дваіх недалёка ад крамы, а непасрэднага выканаўцу — на чыгуначнай станцыі, адкуль ён хацеў з'ехаць у Барысаў.
У дачыненні да барысаўчаніна была ўзбуджаная крымінальная справа па ч. 1 арт. 205 Крымінальнага кодэкса Беларусі, санкцыя артыкула прадугледжвае пакаранне да трох гадоў пазбаўлення волі. У дачыненні да двух іншых затрыманых праводзіцца праверка.
